• Pesoál Supervizór 623 no Enumeradores nain 2345 Partisipa Treinamentu Molok Halao Enumerasaun

Home » Announcements» Pesoál Supervizór 623 no Enumeradores nain 2345 Partisipa Treinamentu Molok Halao Enumerasaun Print Page

Pesoál Supervizór 623 no Enumeradores nain 2345 Partisipa Treinamentu Molok Halao Enumerasaun

IMG-20220829-WA0031

Díli – Diresaun Geral Estatística (DGE), liu hosi serbisu estatístika munisípiu sira realiza sexta-feira ne’e treinamentu ba enumeradór/a no supervizór/a sira iha munisípiu ida-idak, inklui Díli ne’ebé halao iha resintu Insitute of Business (IOB), Fomento II – suku Comoro.
Iha okaziaun ba abertura treinamentu nian, xefe serbisu estatístika munisípiu Díli nian relata katak enumeradores no supervizór sira ne’ebé partisipa iha treinamentu refere mai hosi prosesu rekrutamentu ne’ebé Diresaun Geral Estatística (DGE) rasik maka hala’o no liu ona hosi faze selesaun tolu.
“Munisípiu Díli nian rejista iha inísiu fulan jullu aplikantes hamutuk 1504, husi númeru refere, ema nain 888 maka liu iha selesaun dokumentu hodi hakat ba faze entrevista, ikus liu pesoál nain 99 maka admitidu nu’udar supervizór/a no nain 477 nu’udar enumeradores” Dehan xefe serbisu estatístika munisípiu Díli nian, Emílio Pereira, liu hosi aprezentasaun relatóriu badak rekrutamentu nian.

Entretantu iha biban hanesan, Diretora Estatística Municípios, Maria do Carmo Moreira, ne’ebé reprezenta diretór jerál ba sesaun abertura treinamentu nian hatoo kongratulasaun ba enumeradores no supervizór hirak ne’ebé liu ona iha faze entrevista nian no hatene ona kona-bá serbisu estatístika ne’e rasik, nune’e mós ba trinadór/a sira ne’ebé kompostu husi Master Trainer 20 no Training of Trainer nain 200, hodi fó sira-nia tempu durante semana ida ba treinamentu nian, partikularmente ba sira nain 28 ne’ebé selesionadu hodi fó treinamentu iha munisípiu Díli.
Diretora ne’e mós reafirma tan kona-bá importánsia treinamentu nian ba enumeradores no supervizór sira no realsa katak partisipasaun másima durante treinamentu nian sei sai nu’udar xave ba implementasaun sensus
“Husu ba alin sira, ami hakarak ita-boot sira fó atensaun ho másimu tebes iha treinamentu ida ne’e tanba ita-boot sira maka sei sai xave hodi bele halo susesu ita-nia sensus ida ne’e” dehan Maria Moreira, wainhira deklara loke ofisiálmente atividade treinamentu nian, sexta-feira ne’e (26/08) iha IOB.

Aleinde iha Díli, treinamentu hanesan realiza mós iha munisípiu 12 seluk inklui RAEOA ba pesoál supervizór nain 524 no enumeradores 1868 ho nia númeru partisipante ne’ebé variável entre munisípiu id-idak no tuir planu sei remata iha loron 2 fulan setembru. Sensus tinan ida ne’e halao ho métodu de facto no nu’udar sensus dijitál dahuluk ne’ebé realiza iha Timor-Leste, nune’e prosesu enumerasaun nian sei utiliza android ho naran CAPI ne’ebé permite asesu lokalizasaun mapa ho forma dijitál no bele sinkroniza informasaun ho fásil no lais, diferente ho sensus sira ulu-uluk nian hanesan iha tinan 2004, 2010 no 2015 ne’ebé utiliza de’it kestionáriu manuál (suratahan).