• PR RAMOS-HORTA: SEE MAKA LA PARTISIPA SENSU, ESTADU SEI LA KONTA NIA

Home » Announcements» PR RAMOS-HORTA: SEE MAKA LA PARTISIPA SENSU, ESTADU SEI LA KONTA NIA Print Page

PR RAMOS-HORTA: SEE MAKA LA PARTISIPA SENSU, ESTADU SEI LA KONTA NIA

DSC_0394

Díli (19/09), Prezidente Repúblika Demokrátika Timor-Leste, DR. José Manuel Ramos-Horta afirma partisipasaun povu tomak nian iha sensu populasaun no uma-kain 2022 importante tebes atu estadu bele konta.

Laureadu nobel da paz ne’e salienta liután katak kontribuisaun ema hotu-hotu nian bá fornese dadus no informasaun bá sensu populasaun no uma-kain ne’e nu’udar devér ka obrigasaun ida nomós direitu sidadaun nian atu estadu konta.
“Obrigasaun nu’udar sidadaun no direitu atu estadu konta ita, see maka la partisipa iha sensu signifika estadu sei la konta nia, tanba sensu ne’e importante iha mundu tomak atu ita hatene populasaun hira, joven, kosok-oan, ferik no katuas sira, hela iha ne’ebé no oinsá, estudu, animál hira, propriedade sira inklui internet”, tenik Prezidente Repúblika hafoin fó informasaun bá ekipa sensu nian segunda-feira ne’e iha rezidénsia privada, suku Metiaut Díli.

Iha okaziaun ne’e mós Prezidente Repúblika hato’o observasaun katak progresu Timor-Leste nian di’ak liu kompara ho tempu kolonizasaun portugés no invazaun Indonézia nian, tanba iha mudansa bá rekursu umanu, infraestrutura bázika, inklui fasilidade saúde no telekomunikasaun.

“Tempu portugés la iha doutór ka médiku timór-oan, tempu Indonéziu nian la to’o 20 no ohin loron Timor-Leste iha médiku hamutuk nain 1200, uluk la iha hospitál iha munisípiu no agora iha doutór. iha suku, uluk Díli bá Baucau bele lori loron tomak tanba ponte no alkatraun la iha no agora presija oras rua, uluk la iha eletrisidade no telemóvel enkuantu ohin loron populasaun 96.1% populasaun asesu ona liña eletrika no kuaze populasaun tomak kaer telefone” Dehan PR Ramos-Horta bá pesóal média sira.
Entretantu iha biban hanesan, diretór Silvino Lopes, nu’udar koordenadór jerál bá sensu populasaun no uma-kain 2022 nian, relata katak partisipasaun ema hotu-hotu nian iha sensu importante tebes bá nasaun.

“Dadus importante tebes bá ita-nia nasaun, iha kualkér asuntu saida deít, governu presija dadus atu halo planu ne’ebé di’ak bazeia bá evidénsia ne’ebé hetan husi sensu populasaun no uma-kain, sensu mós sei hatudu mai ita imajen Timor-Leste nian inklui difikuldade hirak ne’ebé eziste” haktuir koodenadór jerál ne’e iha entrevista ho média, Silvino Lopes hatutan tan katak, maske hasoru obstákulu balun husi pesoál enumeradór sira iha baze hanesan liña internet no kestaun tékniku kiik sira seluk, dadaun ne’e, rezultadu provizóriu ne’ebé hetan husi enumerasaun hahú husi loron 4 fulan setembru too agora atinze ona 67% ka ekivalente ho totál uma-kain 189.994 iha teritóriu nasionál.