• Celebration of World Statistics Day 2020 and also Launching various Publications

Home » Announcements» Celebration of World Statistics Day 2020 and also Launching various Publications Imprime pájina

Celebration of World Statistics Day 2020 and also Launching various Publications

DSC_7960

Vice Ministra no Ministra Finansas Interina
BA SELEBRASAUN LORON MUNDIAL ESTATÍSTIKA NO LANSAMENTU PUBLIKASOES IMPORTANTE

Distintus konvidadus husi Instituisoes Públikas, Parseiros Dezenvolvimentu, Sosiedade Sivil, Akademiku, media no partisipantes tomak maka hau respeita.
Ba da-uluk, hodi Ministériu Finansas nian naran, hau hakarak hato’o agradese wain ba ita boot sira nia partisipasaun iha eventu ida nee, hodi selebra “Loron Mundial Estatístika” no lansamentu ba publikasaun importante sira, hanesan: Konta Nasional 2019, Dadus Komersiu Anual 2019, Mapamentos ba Aldeias, Estatistika Krime 2019, no Inflasaun ba Fulan Setembru 2020.
Hau mos hato’o parabéns ba Diresaun Jeral Estatistika, senhor Diretor Jeral no funsionarius tomak, ne’ebe festeza loron estatístika no kontinua hala’o kna’ar ho diak hodi kontribui ba esforsu atu promove politíka públika bazeia ba evidensia ou “evidence based policy making.”

Iha âmbitu pandemia COVID-19, dadus no informasaun ne’ebe kredivel, relevante no atualizada nudar fator determinante atu hasoru no rekopera saúde públika, ekonomia no vida sosial. Nune’e Nasoes Unidas lansa lema “data we can trust” ba tinan ida nee.
Kada tinan, Diresaun Jeral Estatístika selebra loron estatístika nian. Nunee nudar instituisaun públika, Diresaun Jeral ida nee kontinua envolve no dezenvolve nia án atu serví estadu no povu Timor-Leste ho diak, liu husi peskizas, analizes no publikasoes dadus no informasoes estatístikas.
Dezenvolvimentu instituisaun ida nee nudar prioridade Governu nian, hanesan hakarek ka estipula ona iha Planu Estratejíku Dezenvolvimentu Nasional (PEDN) 2011-2030, katak atu transforma Diresaun Jeral Estatístika ba Instituisaun Estatístika Nasional de Timor-Leste hodi asegura independensia no profesionalidade ba fornesimentu dadus no informasaun estatístika. Atu hetan meta ida nee, Diresaun Jeral Estatístika habelar ona nia kna’ar iha Munisipius tomak – inklui iha RAEOA no Ministériu Finansas agora dadaun halo hela preparasaun kuadru legal, rekursus humanus, no fasilidades no infrastruturas nesesarias.

Kna’ar fundamental husi Diresaun Jeral Estatístika maka atu halo peskizas, analizes, no publikasoes regular hodi tulun publiku atu asesu ba informasaun ne’ebe atualizada no kredivel. Nunee publikasaun sira ne’ebe atu lansa nee sei tulun ita atu hatene kona-ba Timor-Leste nia situasaun no dezenvovimentu sosiu ekonómiku, no husu ba entidades tomak atu uza dadus hira nee ho diak tambá informasaun hirak nee hetan liu husi investimentu osan, tempu no enerjia ne’ebe boot.

Publikasaun kona-ba Konta Nasional Timor-Leste sei fo informasaun ekonómika atualizada to’o 2019. Relatóriu nee hatudu rekuperasaun ekonómika 1.8 pursentu husi resesoes ekonómikas iha 2017 no 2018. Haree husi fatores sira ne’ebe kontribui ba kresimentu ekonómiku iha 2019, sétor publiku hetan kresimentu 5.8 pursentu, boot liu kompara kontribuisaun setor privadu ne’ebe aumenta deit 3.2 pursentu. Iha parte seluk, industrias hotu-hotu hatudu kresimentu positivu iha 2019, maibe sei iha nível ne’ebe kiik.

Publikasaun kona-ba komersiu anual hatudu katak Timor-Leste kontinua sai nudar nasaun ne’ebe depende maka’as ba importasaun tambá balansu pagamentu ba komersiu internasional hatudu katak esportasaun boot liu kuaze 400 pursentu ho importasaun. Dadus nee implika katak produtividade ekonómika iha rai-laran sei kiik no presiza hola medidas propriu hodi dezenvolve industrias iha Timor-Leste bazeia prinsipius vantagen komparativa no kompetitiva.
Publikasaun kona-ba Timor-Leste no Munisipius en Numeru 2019 sei iha hela prosesu nia laran nebe sei fo dadus relavantes to’o iha nível munisipius, nunee sei tulun ita atu hatene kona-ba demografia, potensiais no oportunidades ne’ebe kada rejiaun no munisipiu sira iha. Ho dadus hirak nee, sei tulun atu prepara programa dezenvovimentu ne’ebe bele responde duni ba necessidades ne’ebe iha.

Publikasoens sira seluk ne’ebe sei lansa hamutuk iha eventu ida nee ho natureza diferente maibe atu serve objetivu ida deit, katak fo informasaun ne’ebe los, relevante no atualizada.
Atu termina, dala ida tan hau hato’o parabéns ba funsionarius Diresaun Jeral Estatístika tomak, liu-liu sira ne’ebe servisu iha munisipius. Hau enkoraza ita boot sira atu kontinua servisu ho profesional no integridade hodi sai nudar ajentes prinsipais ba informasaun ne’ebe kredivel no atualizada iha Timor-Leste.
Informa mos katak “Relatoriu Sensos Agrikola 2019”, apresenta ona iha Concelho dos Ministros iha 12 de Outubru de 2020 no hetan ona aprovasaun. Iha inisiu fulan Novembru ita sei lansa relatoriu importante ne’e. Ami sei konvida ita bot sira iha lansamentu ne’e.

Obrigado,
Sara Lobo Brites
Vice Ministra no Ministra Finansas Interina