• WORLD POPULATION DAY 2022 – A WORLD OF 8 BILLION: TOWARDS A RESILIENT FUTURE

Home » Announcements» WORLD POPULATION DAY 2022 – A WORLD OF 8 BILLION: TOWARDS A RESILIENT FUTURE Print Page

WORLD POPULATION DAY 2022 – A WORLD OF 8 BILLION: TOWARDS A RESILIENT FUTURE

DSC_7563

12/07/2022, Auditorium UNPAZ – Dirkursu abertura husi Representante Interina – UNFPA iha Timor-Leste Sra. Dra. Domingas Bernardo hateten katak “Hanesan honra no previlejiu bo’ot ida lori UNFPA nia naran hodi mai koalia ho ita bo’ot sira iha ámbitu komemorasaun loron Mundial Populasaun iha fatin ida ne’e. Mundo ohin loron hasoru desafiu barak, loron Mundial bá Populasaun hanesan oportunidade bo’ot ida atu selebra progresu humanu no loron ida ne’e hanesan okaziaun importante ida hodi tau fali atensaun bá asuntu urjenti sira kona-bá populasaun.
Tinan ida ne’e mundu sei rejista marku importante ida – Populasaun iha mundu to’o ona ba billiaun 8! Enkuantu ita foka bá númeru sira, ita mós tenki asegura direitu bá ema hotu! UNFPA apoia hela programa oi-oin husi governo Timor-Leste nian. Ami hare katak saúde maternal/inan ne’ebé la saudável barak liu husi komunidade marginalizado sira nune’e ita hotu presija servisu hamutuk hodi hasai tiha asuntu des-igualidade no ameasa sira ne’e no labele husik hela ema ida iha kotuk. No ho númeru kresimentu populasaun ne’ebé sa’e makas ita tenki tau atensaun bá diversidade demográfika sira liu-liu iha Juventude iha Timor-Leste. No solusaun bá asuntu ne’e laos kona-bá númeru barak ka oituan maibé oinsa mak bele fó assesu oportunidade hanesan bá sira hotu.
Asegura saúde seksual no reprodutiva núdar xave ida bá desenvolvimentu sosio-ekonómiku iha kualker nasaun inklui Timor-Leste. Loron Mundial bá Populasaun bá tinan ida ne’e ho tema: “Mundu ida ho ema billiaun 8: Bá futuru ida ne’ebé reziliente; Kresimentu Juventude iha Timor-Leste: Dezafiu no oportunidade sira” hapar ka kondiz tebes iha UNFPA nia área, ne’ebé ho objetivu atu kontribui bá desenvolvimentu Timor-Leste nian. Hasa’e asistensia bá Planeamentu Famíliar no servisus saúde reprodutiva bá feto sira, maioria husi sira ne’e ho idade jovem no treinamentu bá parteira sira ne’ebé iha abilidade bá partu, inklui Inan adolesentes sira.

Timor-Leste presija tebes atu investe barak iha dadus hanesan Sensus Populasaun ne’ebé planeadu ona bá tinan ida ne’e. No iha kapital humanu hodi hasai tiha barreira sira no fó oportunidade bá ema hotu, inklui sira ne’ebé tradisionalmente marjinalizadu. Ex; Feto, jovem, ferik katuas no defisiente sira.
Hanessan ita marka tiha ona Loron Mundial Populasaun nian, ita tenki muda ita nia konversasaun kona-bá númeru no koalia kona-bá direitu no direitu atu hili no tenki investe iha joventude, feto no labarik feto sira, hodi hari’i futuru ida ne’ebé reziliente, saudável no prósperu liu bá ema hotu iha Timor-Leste”.

Diskursu abertura husi Sr. Cesar Martins mós hateten “Representa Ministério das Finansas, primeiro hakarak hato’o congratula bá Diresaun jeral Estatistika, ne’ebe servisu hamutuk di’ak tebes ho parseira desenvolvimento liu-liu UNFPA, hodi bele organiza eventu seminário loron ohin ne’ebé hodi komemora loron Mundial bá Populasaun. Eventu bá Aktividade ohin importante tebes bá estado no mós bá entidades hotu kona-bá assuntos populasaun, populasaun mundo ohin loron hamutuk ema Billiaun 8, ita hotu ne’ebé ohin marka prejensa iha fatin ne’e, ita mós núdar povu no núdar populasaun iha rai doben ida ne’e, ita mós faz parte iha populasaun mundo ida ne’e.
Oitavo Governo konstituisionál ne’ebé liderado husi, Sua Excia. Jenderal Taur Matan Ruak, fó orientasaun políticos bá Governantes hotu katak, tau populasaun mak núdar sentru bá dezenvolvimentu. Orientasaun ne’e klaru tebes bá governantes sira hotu katak, populasaun mak sai núdar fator sujeitu bá alvo desenvolvimentu hotu”.
Semináriu bá loron Mundial Populasaun nian, iha mós apresentasaun husi Diretór Nasionál Sistema no Relatórios, DGE, MdF, Diretór Silvino Lopes, kona-bá : Saida maka Demográfia Dividend, Timor-Leste Demográfia Dividend no Determinantes, Sensus Populasaun 2022 sai hanesan fontes bá Demográfia dividend.
Iha Diskursu ikus ne’ebé hato’o husi Diretór Geral Estatística MdF, Sr. Elias dos Santos Ferreira “Ha’u hanoin loron Mundial Populasaun ne’e importante tebe-tebes, populasaun ohin temi ne’e ita mós iha laran, 8 billiaun ne’e, sé ita haré bá OJE karik ita nia osan 18.7 billiaun no populasaun iha 8 billiaun ha’u hanoin ne’e honra ida tamba ita atu halo desenvolvimento ida tenki liga ho populasaun, sexta basika mós bá populasaun, inundasaun mós kona-bá populasaun, covid mós kona-bá populasaun, buat hotu-hotu iha populasaun, sem populasaun ita la halo buat ida. Tamba ne’e maka ita atu halo buat di’ak bá ita nia país ne’e halo di’ak bá bem estar ita nia rai doben ida ne’e”.